Nýtið heystfrítíðina aktivt – vit hava karmarnar. VÍF bjóðar aftur í ár øllum hondbóltsáhugaðum at luttaka til ársins Intersport Night Cup. Kappingin verður fyri U10, U12 og U14 gentur og dreingir.
Í ár verður Intersport Night Cup skipað eitt sindur øðrvísi. Í staðin fyri at spælt verður alla náttina, verður kappingin yvir 2 dagar. Byrjað verður hósdagin 18. oktober beint eftir middag við U10. Fríggjadagin 19. oktober byrja so U12 og U14 – eisini beint eftir middag. Byrjunartíðspunktini eru alt eftir, hvussu nógv lið verða við. Neyv skrá kemur tá tilmeldingarfreistin er úti.
Bæði kvøldini enda við “diskoteki” / “hugnakvøldi” fyri hondbóltsspælararnar. Okkurt “Surprise” verður eisini. Tiltakið endar uml. kl. 24:00 hóskvøldið og uml. kl. 01:00 fríggjakvøldið.
Um nóg nógv tekna seg og tørvur er á tí, fer bussur at koyra úr Vestmanna eftir tiltakið. Tilmelding til bussin krevst og kostnaðurin verður kr. 50,- fyri hvønn.
Vinnandi liðini av kappingini (í hvørjum aldursbólki) fáa ein super lekkran vinning – sum verður Bowling og mat til alt liðið. Eisini fáa tey steyp og heiðursmerki.
Praktiskar upplýsingar:
Tilmeldingin fer fram við at senda sms á tlf. 219099 og tlf. 216004 ella teldupost til eyd.hansen@gmail.com í seinasta lagi mánadagin 15. oktober 2018.
Tá meldað verður til, skal tað verða í liðum – tvs. at ein kann ikki melda einstaklingar til. Tal á spælarum pr. tilmeldað lið, skal tó upplýsast.
Kostnaðurin fyri hvønn luttakara er kr. 200,-. Við í prísinum er ein lekkur Adidas Night Cup blusa, toast og ókeypis frukt og vatn meðan kappingin er.
Luttøkugjaldið skal gjaldast, við at flyta eina upphædd fyri hvørt lið á 6460 154.208.9 ella gjaldast av venjara í høllini áðrenn kappingin byrjar. Vit taka ímóti øllum gjaldskortum og kontantum.
Minnist til at eggja leikarum tykkara at luttaka til Intersport Night Cup, tí slík tiltøk skapa vinarbond tvørturum feløg og ikki minst skapa samanhald millum spælararnar á liðnum, og sum eisini er ein fyritreyt fyri góðum hondbóltsspælið og góðum úrslitum.
Við ítróttarkvøðu
VÍF
